NguChris Totobela
Bekuxhelw’ exhukwane kubalandeli bebhola yombhoxo kule mpelaveki sisuka kuyo nanjengoko ooxholovane namavulandlela iWinter Rose ibiqubisene neqela elisandula ukuyilwa, Isibane Rugby Academy, kumdlalo wobuhlobo.
Isibane liqela elakhiwe ngamakhwenkwe agqamileyo aphuma kwizikolo ezahlukeneyo.
Nangona bekungekho lula kulo mdlalo, Isibane silwe kwamdak’ iisali saphumelela ngamanqaku angamashumi amabini eqandeni.
Umongameli weWinter Rose, uRamie Xonxa, uthi uxolile yindlela iNdlovu Enebatha edlale ngayo kulo mdlalo. “Eyona nto endiphuma nayo kulo mdlalo yindlela abadlali bethu abazinikele ngayo. Asikhathazeki tu kwaphela ngamanqaku esibethwe ngawo ngoba eyona nto engamandla kuthi ngoku kukubuyela kweli qela ebaleni.”
Uye waqhubekeka lo kaXonxa wenza ikhwelo kwabo banomdla wokuzibandakanya neli qela. “Kubo bonke abanomdla wokudlalela eli qela, sifumaneka eGazini ngoMvulo ukuya ngoLwesine ngecala emva kwentsimbi yesine.”
Linyathelo elihle eli lokuvuselelwa kweli qela elibaluleke kangaka kwimbali yombhoxo waseMzantsi Afrika.
