NguChris Totobela
Zidla zigoduka ngoku kwisigaba soompondo zihlanjiwe kwiMakana LFA. NgoMgqibelo kwicandelo B, iRhodes University ibambene ngenqaku elinye neMakana Tigers logama iYoung Eagles ibhaxabule iSeven Stars ngamanqaku amathandathu kwamabini. Komnye umdlalo iRiebeek East Academy ibethe iGolden Brothers, ethande ukuba yingqongqo mvanje, ngamabini eqandeni.
NgeCawe, kwicandelo A, iHellenic itywatyushe iJacaranda Aces ngamanqaku amahlanu eqandeni logama iJoza Stars ibethe iAfrican Spears ngamathathu kwelinye, yaze yona iRiebek City ethe ngcu encochoyini yavuthulula iCameroon ngamanqaku alishumi eqandeni.
Kumdlalo wokugqibela nobutakisa iintlantsi iSophia Stars iphantse yohluthwa intlaka emlonyeni ngethuba ivumela iJoza Callies ibuye sele isilela ngemva ngamanqaku amabini eqandeni, yalinganisa phambi kokuba iSophia Stars ifake inqaku elihle kakhulu lokuphumelela umdlalo. Komnye umdlalo wecandelo B obudlalwa ngeCawe, iRhodes ibethe iMaru Academy ngamahlanu kwelinye.
