NguChris Totobela
Kushiyanwa ngotyefezo ngoku kwisigaba sokuqala seMakana LFA.
Athande ukunyuka umnqantsa amaqela angakhange azilungiselele kakuhle.
NgoMgqibelo iqela elikhokelayo kwisigaba sokuqala iJoza Stars ibambene ngenqaku elinye macala neSantos logama yona iYoung Eagles ibethe iMayfield ngamanqaku amabini eqandeni, yaze yona iRiebeek East Academy, ethande ukungahleki nanye ehlekisayo mvanje, yabhaxabula iRising Stars ngamanqaku amathandathu kwelinye.
Yona iCameroon ingcwabe iTantyi Eleven, ejonge intshinga ngamehlo abomvu, ngamanqaku asixhenxe eqandeni, logama IJacaranda Academy ibethe iVukani Anchors ngenqaku elinye eqandeni.
NgeCawe iTantyi Eleven ibuyise isidima sayo ngethuba itywatyusha iBlack Stars ngamanqaku amathathu eqandeni, logama yona iCameroon iphinde yantywilisela iJacaranda Academy phantsi kwamanqaku amahlanu kwelinye yaze iVukani Anchors yaphinda yongeza kwiinzingo zeMayfield ngamanqaku asibhozo kwamathandathu.
IJoza Stars iqale apho ibiyeke khona yabhaxabula iEagles ngamanqaku amahlanu kwamabini, logama iRiebeek East Academy itywatyushe iSantos ngamanqaku amathandathu kwelinye.
