NguChris Totobela
Kuya kusibanzima kwamanye amaqela adlala kwisigaba soompondo zihlanjiwe kwiMakana LFA. NgoMgqibelo iRhodes ibhulele oogqirha nezicaka iLove and Peace ngamanqaku asixhenxe eqandeni (7-0) logama iSophia Stars ibethe kabuhlungu iLalibela Lions ngenqaku elinye eqandeni (1-0) kumdlalo obuvulekile ngeyona ndlela, amaqela omabini efunza edabini enukiselwa ligazi. NgeCawe iMaru Academy ibethe iYoung Stars ngamanqaku amane kwamathathu (4-3) logama iAttackers ikhwele izehlela kwiSeven Stars ngenqwaba yamanqaku asibhozo kwelinye (8-1), yaze yona iGolden Eagles yabhaxabula abatshakazi iHellenic ngamanqaku amane kwelinye (4-1). Kwidabi lakudala lalapha eMakhanda elalikade litsala umdla wabalandeli abaninzi bebhola ekhatywayo, iJoza Callies igalele iJuventus ngamanqaku amane eqandeni (4-0). AmaTaliyane akhangeleka enyuka umnqantsa kwesi isigaba akuso kwaye kuzakufuneka axoze mphini wumbi, abhinqele phezulu ukuba awafuni ukubuyela ehlathini.
