NguChris Totobela
Kuzobe kuqhawuka uNobathana kule mpelaveki siya kuyo kumabala aseSt Andrews College. Amaqela ezikolo zalapha eMakhanda, eziquka abadlali abangaphantsi kweminyaka elishumi elinesithoba, bazobe begudlana bejijisana besilwela indebe yeKay Motsepe.
Kwelinye icala nabo abadlali abangaphantsi kweminyaka elishumi elinesine bazobe bevana amandla besilwela eyabo indebe . ISt Andrews izobe isusa umbethe kwibala iKnowling xa izobe iqhubisene neTEM Mrhwetyana kumdlalo wokuqala wabo baminyaka engaphantsi kweshumi elinesithoba, logama nakwi bala iSt Aiden’s izobe iphinda isusa umbethe xa isingatha iAndrew Moyakhe kumdlalo wokuqala baminyaka engaphantsi kweshumi elinesine.
Unobhala jikelele we Makana LFA nokwa ligosa elongamele ukhuphiswano uthembisile ukuba bazakuzama kangangoko ukuqinisekisa ukuba imidlalo ihamba ngendlela ecwangciswe ngayo kwaye bancothula neengcambu ukunganyaniseki nobuqhophololo obenziwayo ngeminyaka yabadlali.
Iqela eliphumelelayo kule tumente lizokufumana inyhweba yokumela le ngingqi yeSarah Baartman kwimidlalo yephondo yalapha eMpuma Koloni.
