NguChris Totobela
Bekuxhelwe exhukwane kubathandi bebhola ekhatywayo kule mpelaveki sisuka kuyo nanjengoko imidlalo yeMakana LFA iphinde yabuya. Amaqela ebebila esoma exhwithana kwimidlalo ebibanjelwe kwibala laseFiddler’s Green.
Ngomgqibelo iLove and Peace ibethe iAfrican Spears ngamanqaku amane kwamabini, logama yona iYoung Eagles ejonge le ndebe ngamehlo abomvu ibhaxabule iGolden Eagles ngamanqaku asixhenxe kwelinye kumdlalo obuthande ukekelela calanye.
NgeCawe i6Sai Army ibethe iEagles ngamanqaku amathathu kwelinye logama yona iMakana Tigers ibhungce ngamanqaku amathathu kwamabini ngethuba iqhubisene neMaru Academy. Komnye umdlalo obutakisa iintlantsi oomakadebona iJoza Callies ibambene ngamanqaku amabini macala neSophia Stars ezintandane zoku phakamisa le ndebe okokuqala kwi mbali yabo. Iya isongana ibhobhile kancinci ngoku kule midlalo kwaye amaqela amaninzi abhinqela phezulu ngoku logama amanye esiya elahla ithemba.
Kule midlalo imbalwa ishiyekileyo kuzohluzwa amakhwenkwe emadodeni. Kuzofuneka nabo ooSompempe babhinqele phezulu banyuse umxakatho nanjengoko soloko besenziwa ityholo lokusithela xa iziphumo zingahambi ngendlela amaqela anqwenela ngayo.
