Ngu CHRIS TOTOBELA
ISophia Young Stars izintshatsheli ezintsha zeMakana LFA kwisigaba sokuqala. Oku kwenzeka emva kokuba iswantsulise i-Eagles kumlenze wokuqala womdlalo wobuntshatsheli.
Ngomgibelo iSophia Young Stars ibhaxabule iEagles ngamanqaku amane eqandeni yaze ngokwenza njalo yazibeka ethubeni elihle lokuphumelela. Kumlenze wesibini odlalwe ngeCawe i-Eagles iye yaphumelela ngamanqaku amathathu kwamabini kodwa ke yakhala ngaphantsi xa kudityaniswa onke amanqaku nanjengoko iSophia ibisele izilungiselele ngoMgqibelo.
ISophia Young Stars iphumelele ngamanqaku amathandathu kwamathathu kulomdlalo emva kwemilenze emibini. Nangona iphumelele kodwa ayisayi kunyukela kwisigaba esingentla soompondo zihlanjiwe nanjengoko sele benalo iqela elipha.
Umphathi weqela iSophia Young Stars uLindisipho Swaartbooi uthi lempumelelo ayibothusanga nanjengoko bedlale ngokuzimisela usukela mhla kusungulwa olu khuphiswano. Utyatyadule wathi nangona iEagles idlalise abadlali abathathu bekungafanelanga bedlalile kule midlalo kodwa amakhwenkwana akhe adlala ngokuzinikela.
