NguCHRIS TOTOBELA
Onke amehlo abathandi nabalandeli bebhola ekhatywayo yalapha eMakhanda azobe ethe ntsho kumaqela alapha ekhaya. Kule impelaveki esiya kuyo, kuzobe kubuyelwa ebaleni nalapho imidlalo yeMakana LFA yoompondo zihlanjiwe izakube iqhubekeka apho ibiyeke khona.
NgoMgqibelo iJacaranda Aces ejonge lentshinga ngamehlo abomvu izokungquzulana neCameroon engaqalanga kakuhle tu kwaphela, lomdlalo uzakube ubanjelwe eJD Dlepu ngentsimbi yokuqala.
Komnye umdlalo olandela lo ozakuqala ngentsimbi yesithathu, i6Sai esandula ukunyuselwa kweli inqanaba izakuvana amandla noomakade benetha iJoza Callies eqale kakubi ngeyona ndlela nalapho izakufumana ithuba lokubuyisa isidima sayo.
NgeCawa iGrahamstown United ethe ngcu phezulu izakudibana neNew Seekers kwibala laseFiddlers Green ozakuqala ngentsimbi yeshumi elinanye. INewtown City eqale kakuhle igagana neSophia Stars eJD Dlepu ngentsimbi yokuqala, logama yona iYoung Eagles ebaleka ngolona hlobo izakube iqhubisene neAttackers kumdlalo ozakube utaka iintlantsi nozakube ujongwe ngamehlo abomvu.
Akuzobalula kuwo onke lamaqela nanjengoko esandula ukubuya kwikhefu lweziyunguma, nalapho inxalenye yabadlali ibizinika kwizibiliboco ezahlukeneyo. Eli izakuba lithuba elihle lokuqokelela amanqaku kwabo baqale kuselithuba ukuzilolonga belungiselela lemidlalo.
