NguCHRIS TOTOBELA
Bekuxhelw’ exhukwane kubalandeli bebhola ekhatywayo, nanjengoko imidlalo iqale ngoLwesine umhla wamalungelo abantu. NgoLwesine iYoung killers iphazamise iJacaranda Aces kwiinzame zayo zokuphumelela indebe yeleague ngethuba iyiphosa phantsi eluthulwini ngenqaku elinye eqandeni. ILove and Peace ibhaxabule iCameroon ngamanqaku amahlanu kwamabini, logama iMakana Pillars izenzele kwiRiebeck City ngamanqaku asibhozo eqandeni.
INewseekers ibethe iSophia Stars ngamanqaku amathathu eqandeni, logama iAttackers izibhulele iFuture Stars ngamane kwelinye. IJoza Callies ibhuqe iNewtown City ngamanqaku amathathu eqandeni. NgoMgqibelo iJoza Callies ibethe iAttackers kwidabi laseJoza elidala ngenqaku elinye eqandeni kumdlalo obutaka iintlantsi.
INewseekers ibethe iNewtown City ethande ukuba yingqongqo mvanje, ngenqaku elinye eqandeni. IRiebeck City itsalele iFuture Stars engakhange ifike kumdlalo obucwangciselwe eHoloholo, logama yona iMakana Pillars ibethe iYoung Killers ngenqaku elinye eqandeni. ILove and Peace igalele ityuwa enxebeni leJacaranda Aces ngamanqaku amabini eqandeni.
ISophia Stars izixhwithele nayo kwiCameroon ngamanqaku amane kwamathathu. NgeCawa iLove and Peace ibhaxabule iSophia Stars ngamanqaku amathandathu kwamabini, logama iNewtown City yothuse iCameroon ngamanqaku amahlanu kwamane. IYoung Killers ibethe iFuture Stars ngamathathu eqandeni yaze iAttackers yadlala ngokulingana neNewseekers ngamanqaku amabini macala.
Umdlalo weJacaranda Aces neMakana Pillars uye wabekelwa omnye umhla. Kumdlalo obutsale umdla wabantu abaninzi, amagqiyazana alapha ekhaya anembali entle ngempumelelo yayo iAfrican Connection iseze iyunivesithi yaseFort Hare ukhalakhulu ngethuba iyibetha ngamanqaku amathathu kwelinye. Amanqaku eqela lasekhaya aze noGoodness Maumo, Nwabisa Tyelbooi noAnam Nqweniso.
