By Zongezile Matshoba
Ndiculele
Ntyiloza imiqolo edida ingqondo yam
Xakekisa imilebe yam de ibhude imbudede
Loqisa ulwimi lwam lungangqandeki
Thuma uvalo ludlale amagubu
Cula umvandedwa uzokulinganisa ngokuzolileyo
Xelisa imiqhagi ngoqhiza
Gquma okwamaza olwandle ekhweba
Khonya okwezinja zitshintshiselana ngomkhulungwana ongaxhalabisiyo
Cula uxelise iintaka ezintathu ezabonwa nguMarley
Ququzelisa usiputsu ndimcel’impinda
Yeka iminwe yam idlale isiginci ngeembambo zam
Iinyawo zam zingqisha luyolo zisonqena ukombelela
Thandondini yenza izandla ziqhwabe iminwe yonqene ukunqakraza
Amehlo avalwe mbakra ebona wena wedwa
Iingcinga zibesenzonzobileni
Yiba ngumsasazi wam undiphindaphindele loo ngoma
Apha Naphaya
S2P – Songs of lifeApha kunoo gqadambekweni
Oondwebilashe
Oozanazo
Kuthiwa ababuzi mntwini
Bavele benze
Basuka bathi pahaha
Njalo nje kungaphela iyure
Maxa wambi ngecala nje
Rhoqo ngosuku
Bambi ide ibe yiveki
Mhlawumbi ide ibe yinyanga yonke
Oothand’izinto belindile
Bakuphaka bakushiya ubambe ongezantsi
Uqhwab’izandla wena
Ukhuz’umangal’uhlek’izigigaba
Abanye babo bathi ndimamele
Bambi bathi sukujonga nje bukelisisa
Oophopho bathi fund’uphengulule
Umlo Ongendawo
Kwavumbuluka umlokazi
Kwavuthuza umoya
Kwaqhum’ isisi
Umlilo wawuphum’ amadangatya
Ulatyuza urhawula kwanto
Uzibabaza ubunganga
Ilanga entla phaya
Laligqats’ ubhobhoyi
Livuyelwa naziintlanz’ emanzi
Wazingomb’ isifub’ umlilo
Usithi ufudumez’ abaqhaqhazelayo
Ugcade babengamalahle abadelelayo
Lalingaziyekelang’ ilanga
Lisithi lithe tshitshilil’ izwe lonke
Ligcakanyelwa ze lenz’ imbalela kwabadelelayo
Udiniwe umoya wazipholela
Ulephuza ngapha nangaphaya
Ulindele ozakuwuthinta
Ebudikwa amanzi azam’ ukulamla
Ekhumbuza ukunxanwa okubangelwa sesosibini
Agqiba ngokugrogrisa ngokuthi qubhe
Iinkani ezazilapho kwesosibini
Athi nta iindlebe edikiwe
Suka ee phoko kwathuleka
Zongezile Matshoba is winner of the isiXhosa category of the Avbob Poetry Project Competition. When not writing award-winning poems, Matshoba is manager of education and public programmes at the Amazwi SA Museum of Literature.
