NguChris Totobela
Kuzakuqhawuka unobathana kwaye kuzabe kusithiwa igwala kulonina xa kuzabe kubanjwe itumente yokubhiyozela umhla wolutsha eMakhanda kwiimpelaveki ezimbini ezizayo.
Iqela lamagqiyazana lebhola ekhatywayo lalapha eMakhanda nelenza imbali ngokuphumelela intshinga yengingqi yeSarah Baartman izihlandlo ezisixhenxe zilandelelana, iAfrican Connection, izakusingatha isiqendu sesibini setumente yebhola ekhatywayo edlalwa njengenxalenye yemisitho esetyenziselwa ukubhiyozela umhla wolutsha (June 16) kuMzantsi Afrika uphela.
Kulo nyaka uphelileyo icandelo lamadoda lale tumente laphunyelelwa yiGolden Eagles, yaze yona iBathurst City Tigers yaseBhatisi yaphumelela icandelo lamagqiyazana, ibetha oosotheko kumdlalo wamagqibela kankqoyi.
Nale yalo nyaka itumente, nezakubandakanya amacandelo amabini, izakubanjelwa kwibala elidumileyo lebhola ekhatywayo lalapha ekhaya, iJD Dlepu.
Onke amaqela azakuthatha inxaxheba azakuthelekiswa ngomhla weshumi elinambini kule imiyo eJoza Indoor sports Centre ngecala lentsimbi yesine.
Kulindeleke ukuba aphume ngobuninzi amaqela njenganyakenye azokuthatha inxaxheba, nanjengoko eli ilithuba lokujonga ubume bamaqela abo, kwaye azilole ezilungiselela ukuqala kwemidlalo yeMakana LFA.
