NguChris Totobela
Kugoso okwaphukayo kuwo omabini amacandelo kwaye kuhluzwa amakhwenkwe emadodeni ngoku nanjengoko isiya isongana ibhobhile kwiMakana LFA.
NgoMgqibelo iJoza Stars ibethe iJacaranda Aces ngamanqaku amabini kwelinye, logama yona iJoza Callies ibhaxabule iLove and Peace ngamathathu kwelinye, yaze yona iRhodes, nethande ukutyhila kwelinye iphepha mvanje, yakhwela izehlela kwiRising Stars ngamanqaku asibhozo eqandeni.
Kumdlalo obujongwe ngamehlo abomvu iRiebeek City ibethe iSophia Stars ngenqaku elinye eqandeni kwibala lase Holoholo.
NgeCawe iRising Stars idilikelwe ngumgodi ngethuba isohlwaywa yiYoung Eagles ngamanqaku amathandathu kwelinye, logama iMakana Tigers ibethe iGolden Eagles ngamathathu kwelinye. IRiebeek East Academy yona iye yazixhwithela kwiSeven Stars ngamanqaku amathandathu eqandeni.
Kumdlalo wokugqibela, iRhodes ivuthulule iGolden Brothers ngamahlanu kwelinye. Eli qela ledyunivesithi likhangeleka lisethubeni elihle lokuphumelela icandelo layo, kodwa ke akuzobalula nanjengoko iMakana Tigers neYoung Eagles zingazokuyekelela umxakatho. Eli qela labafundi lisemva ngemidlalo emine kwelo likhokelayo iMakana Tigers.
