NguChris Totobela
Ibingumbho nomxesibe, abalandeli nabathandi bebhola ekhatywayo eMakhanda bethontelene bejongise imibombo kwibala lemidlalo iJD Dlepu nalapho bebeyokuxhasa usompempe owaziwayo uLuvuyo Ntlanjeni nowaziwa njengoBiemba.
Lo ka Ntlanjeni ebevuthela impempe kumdlalo wakhe wokugqibela phambi kokuba ayosule ayifake etyesini impempe yakhe emva kweminyaka engamashumi amathathu anesihlanu eyivuthela.
Phakathi kwabantu abamncome bamtyibela lo kaNtlanjeni ibe ngusihlalo weMakana LFA uAfika Adam. “Akukho lula ukuthi ndlelantle kusompempe ophume izandla nosisisele senyathi njengalo. Unesibindi sokuphatha imidlalo eyoyikwayo ngabanye oosompempe. Siyabulela kakhulu kuye ngenkonzo yakhe ende engenachaphaza, kwaye sibulela nosapho lwakhe ngokusiboleka yena. Wamkelekile ukuba aze azokwabelana noosompempe abasakhulayo ngamava akhe.”
UNtlanjeni uphefumle naye emva kwalo mdlalo wakhe wokugqibela buphakathi kweXI Attackers neMighty Forest yaseCawa. “Ndiva kamnandi kakhulu namhlanje xa ndibeka impempe yam phantsi emva kweminyaka engaka. Bekungekho lula kodwa ke kude kwalapha oko ndinyamezele. Umyalezo wam koosompempe abasakhulayo uthi mabaqiniseke ngento abayenzayo, kwaye bangoyiki, bamele inyaniso ngalo lonke ixesha.”
Uphinde wabulela abantu abaphume ngobuninzi bezomxhasa. “Ndiyabulela kakhulu kubantu abancame izinto zabo beza apha bazokundixhasa ngale mini yam enkulu kangaka. Ndiyabulela kakhulu nakuni oonondaba ngobukho benu apha nangokuthi gqolo nisimisa ngeenzwane niphicotha indlela esiqhuba ngayo kule midlalo nanjengoko lo nto iye ibangele ukuba sizimisele ngalo lonke ixesha xa siphethe umdlalo. Ndicela abantu baseMakhanda bathi gqolo besiza ebaleni bazokuxhasa ibhola yethu bangadinwa.”
Lo kaNtlanjeni ngomnye woosompempe abaliqaqambisileyo igama lalapha eMakhanda kwaye bathetha ngazwi linye abalandeli bebhola besithi uzakukhumbuleka ngobugadalala nobungqingqwa bakhe ebaleni, kodwa ke kufanele ayokuphumla nanjengoko iminyaka ingasekho kwicala lakhe.
Huntshu mfo kaNtlanjeni umzila wakho uyabonakala.
