NguChris Totobela
Iqhubile imidlalo yeMakana LFA yesigaba soompondo zihlanjiwe kule mpelaveki sisuka kuyo.
NgoMgqibelo kwibala iJD Dlepu, iRising Stars itsalele iSeven Stars engakwazanga ukuthatha ibala ngexesha ebisikelwe lona, yaze yona iMakana Tigers, ethande ukuba nobuzaza mvanje, yabetha oomabuya ekwendeni iYoung Eagles ngenqaku elinye eqandeni, logama iRiebeek East Academy itsalele iMaru Academy engakwazanga nayo ukuthatha ibala ngexesha ebisikelwe lona.
NgeCawe iHellenic ibethe iAfrican Spears ngamanqaku amabini eqandeni, logama iLove and Peace ibhaxabule iCameroon ngamane kwelinye, yaze yona iRiebeek City yatywatyusha iJoza Stars ngamanqaku amane kwelinye.
Kumdlalo obujongwe ngamehlo abomvu, iSophia Stars khange ibonakalise ntlonipho ngethuba ikhwela izehlela kwiJacaranda Aces ngamanqaku amane kwelinye kwibala beligcwele ngabathandi bebhola.
