NguChris Totobela
Akudlalwa kuyadlalwa ngoku kwisigaba sokuqala seMakana LFA nanjengoko amaqela ezijaca, ezijula ijacu.
NgoMgqibelo, iRising Stars ibethe iSantos ngamanqaku amathathu kwelinye, logama iCameroon igqebhe iJoza Stars iduma elingophiyo ngamanqaku amabini kwelinye, yaze yona iBlack Stars yashiya abantu bebambe ongezantsi ngethuba iqubula iEagles ngamathathu kwamabini.
ITantyi Eleven iye yabuyisa isidima sayo ibhaxabula iVukani Anchors ngamane kwelinye, logama yona iRiebeek East Academy ibingathi idiliza ityotyombe ngethuba itywatyusha iMayfield ngamanqaku asithoba eqandeni.
NgeCawe, iJacaranda Academy ibambene neBlack Stars ngamabini macala logama iTantyi Eleven ibethe iMayfield ngamanqaku amabini eqandeni, yaze yona iEagles yabetha iSantos ngenqaku elinye eqandeni.
ICameroon ithomalaliswe amandla yiRiebeek East Academy logama iRising Stars nayo iwuphumelele umdlalo wayo.
Azamile kakhulu amaqela ancwase le ndebe nanjengoko usiya uvaleka kancinci umsantsa phakathi kwawo neqela elikhokelayo.
