NguChris Totobela
Iqhubile imidlalo ye Makana LFA yesigaba sokuqala kule mpelaveki sisuka kuyo. Le midlalo bibanjelwe kwikhaya lebhola lalapha eMakhanda iJD Dlepu. NgoMgqibelo iEagles ibhungce ngamanqaku amabini kwelinye ngethuba ibiqubisene ne Mayfield.
Abakhokelayo kumanqwanqwa esi sigaba sokuqala seMakana LFA, iJoza Stars, ibethe iBlack Stars, ethande ubhidwa yinja uvuthwa mvanje, ngamanqaku amathathu kwamabini logama yona iTantyi Eleven ibuye sele isilela ngemva ngamanqaku amabini kwelinye yaze yoyisa iRiebeek East Academy ngamanqaku amahlanu kwamathathu kumdlalo obuchwayitisa abalandeli nobu nesantya esiphezulu ngeyona ndlela.
IVukani Anchors ibhaxabule iLeicester City ethande ukuba yingqongqo mvanje ngamanqaku asibhozo kwamathathu yaze yona iSantos yabetha iJacaranda Academy ngamanqaku amathathu eqandeni.
NgeCawe iJoza Stars ibethe i Mayfield ngamanqaku amabini kwelinye logama yona iRiebeck East itywatyushe iLeicester City ngamanqaku asithoba kwelinye yaze yona iCameroon yazixhwithela nayo kwiBlack Stars ngamanqaku amabini eqandeni.
IVukani Anchors zibambene ngamanqaku amabini macala neJacaranda Academy yaze yona iTantyi Eleven yabetha i Eagles ngenqaku elinye eqandeni.
Kusezakubanzima kakhulu kumaqela angaqulanga kakuhle nanjengoko ifikelela kuvuthondaba le midlalo.
