NguChris Totobela
Bekuqhawuka unobathana kwimidlalo yeMakana LFA yesigaba sokuqala kule mpelaveki sisuka kuyo. Kushiyana oomama ukondla ngoku nanjengoko iya isongana ibhobhile.
NgoMgqibelo iRising Stars ikhwele izehlela kwiLeicester City ngamanqaku amane eqandeni, logama yona iMayfield ihluthe intlaka emlonyeni weJacaranda Academy ngamanqaku amathathu kwamabini, yaze yona iTantyi Eleven yabambana ngamanqaku amathathu macala ne Vukani Anchors.
ISantos ibhaxabule iBlack Stars, ethande ukubhidwa ngumhlola mvanje, ngamanqaku amane eqandeni, logama iJoza Stars ibambene ngenqaku elinye macala ne Riebeck East Academy.
IBlack Stars idlale ngomkhunyu kulanjwa ngethuba ibambana ngamanqaku amathathu macala neEagles emva kokukhokela ngamanqaku amathathu kwelinye ithuba elide, yaze yona iJoza Stars yathula kabuhlungu encochoyini iRising Stars ngamanqaku amathathu kwelinye kumdlalo obuvutha bhe.
ITantyi Eleven ibethe iCameroon ngamanqaku amabini kwelinye, yaza iJacaranda Academy yatsalela iRiebeek East Academy engakwazanga ukuthatha ibala ngexesha belibekelwe umdlalo. Aya eqinisa kakhulu ngoku amaqela amaninzi kwaye abhinqela phezulu nanjengoko kuthezelwa emnxebeni ngoku.
