NguChris Totobela
Bekuthe bhazalala kwisixeko seengcwele kule mpelaveki sisuka kuyo, ingumbo nomxesibe abantu bezitikatika kwiziyunguma nezibiliboco nanjengoko bekuvalwa umnyadala wenkcubeko obubanjelwe kwesi sixeko sethu.
Amaqela ebhola wona ebebila esoma emaxhaphetshu elwela amanqaku amathathu ezama ukulungisa indlela yokuzibekela indawo kwisigaba soompondo zihlanjiwe kwiMakana LFA.
NgoMgqibelo iRising Stars edlala kakuhle mvanje ibhaxabule iEagles ngamanqaku amathathu eqandeni, logama yona iLeicester City neMayfield zibambene ngamanqaku amabini macala.
IJoza Stars ibethe iCameroon ngamanqaku amabini kwelinye. NgeCawe iJacaranda Academy itsalele iAttackers Academy.
Kumdlalo obuvala ibala nobuthande ukuba nenqwaba yamanqaku, iTantyi Eleven ibingathi idiliza ityotyombe ngethuba itywatyusha iSantos ngamanqaku alishumi kwamathathu kumdlalo obukekelele calanye.
