NguChris Totobela
Bekuxhelw’ exhukwane kubalandeli bebhola ekhatywayo nanjengoko imidlalo yeMakana LFA yesigaba soompondo zihlanjiwe ibuyele kwikhaya lebhola ekhatywayo yaseMakhanda iJD Dlepu nalapho baphume ngobuninzi emva kwesithuba esinga phezulu konyaka livaliwe elibala.
NgoMgqibelo iGolden Eagles ibhaxabule iAfrican Spears ngamanqaku amane kwelinye, yaze yona iMaru Academy yatywatyusha iHellenic ngamanqaku amahlanu eqandeni.
NgeCawe iMakana Tigers ibethe iJuventus ngamanqaku amathandathu kwamathathu logama yona iLove and Peace ibethe iLalibela Lions ngamabini eqandeni yaze yona iSophia Stars yazixhwithela kwiGolden Brothers ngamanqaku amahlanu eqandeni.
Kowona mdlalo obuvutha bhe, utaka amadangatye, iRhodes University ibhungce ngamanqaku amabini kwelinye ngethuba ibiqubisene noomakadenetha iJoza Callies. Bekudlalwa mpela kulo mdlalo, kungafundiswa iintaka ukubhabha nangona usompempe obephethe lo mdlalo ephantse wasithathela kuye isithatha kulo mdlalo.
