NguChris Totobela
Umhla weKrisimesi ufike phambi kwethuba kwiqela lebhola lama gqiyazana laseQhorha iCity Lads eliphantsi kukaLuyanda Sitwayi. Lo kaSitwayi okwa ngumlawuli oyintloko weLuyanda Sitwayi Foundation ngomnye wabantu abazama ukuvuselela ibhola ekhatywayo yamagqiyazana kule ngingqi yeSarah Baartman.
Eli qela lizibhaqe liwelwa ngumqa esandleni emva kokuba uSodolophu weSarah Baartman uMnumzana uDe Vos, ebinze ngeembasa zegolide nesilivere kwakunye nendebe kweli qela. Lo ka De Vos ukwenza oku ezama ukuncedisa kwiphulo lokuzama ukuvuselela nokuphuhlisa ibhola ekhatywayo yamagqiyazana kule ngingqi yeSarah Baartman etsale nzima iminyaka emininzi.
Esenza izwi lombulelo lo kaSitwayi uthe, “Lento eyenziwa ngu Sodolophu izokwenza utshintsho kwimeko emaxongo amagqiyazana anetalente ajongene nayo kule ngingqi yethu”.
Kukhangeleka ingathi iintsuku zobumnyama kwibhola ekhatywayo yamagqiyazana kule ngingqi izoba yinto yezolo.
