Ngu CHRIS TOTOBELA
Kule mpelaveki siya kuyo iCity Pirates izobe isamkela iMighty Forest yase Cawa, ze yona iMaru ijongise imibombo eQhorha nalapho izakuvana amandla neFriendly City kumdlalo ozakutakisa iintlantsi. IJacaranda Aces kunyanzelekile iwafumene onke amanqaku xa izakutyelela iGolden Chiefs yase Mnyameni kodwa ke kuzofuneka ilwe kubemdaka iisali ukuba ifuna ubuya nodumo.
Iqela lalapha ekhaya iMaru isathe ngcu phezulu kumanqwanqwa okhuphiswano lwenginqgi iSarah Baartman oluxhaswa ngabakwa SAB. IMaru ayikabethwa kwimidlalo esithoba eyidlalileyo nalapho iphumelele emithandathu yaze yadlala ngoku lingana kwimidlalo emithathu. Iqokelele amanqaku angamashumi amabini ananye logama abahleli kwi ndawo yesibini
iFriendly City yase Qhorha iqokelele amanqaku alishumi elinesixhenxe. Kusenzinyana kumanye amaqela alapha ekhaya nanjengoko iCity Pirates ehleli kwindawo yesihlanu iphumelele imidlalo nje emine,yadlala ngoku lingana kwemibini logama ibethwe kwimidlalo emithathu. IJacaranda Aces ehleli kwindawo yesixhenxe kumaqela asithoba iphumelele imidlalo emithathu,yaze yadlala ngoku lingana kumdlalo omnye logama iphulukene nemidlalo emihlanu yonke. Ithuba lisekhona lokuba la mabini amaqela alungise imeko yawo azokuphucula nendawo ahleli kuzo kolu khuphiswano.
